المساعد الشخصي الرقمي

مشاهدة النسخة كاملة : لقاء صحفي مع سيف عبدالله الحرمي



بوفهد
01-24-2010, 08:34 PM
مقابلة أجريت مع سيف بن عبدالله الحرمي البالغ من العمر 88 عاماً وبثت على موقع يوتيوب بالإنترنت بواسطة ابن الرمس . وتشتمل المقابلة على ذكر لمختلف القبائل العربية الساكنة ببلدات بساحل فارس وبإشارة لقادتهم وشخصياتهم البارزة ولكنهم تلاشوا من تلك المواقع إما بداعي طول العمر أو بالهجرة والسفر إلى البر المقابل لأسباب شتى. وتتصل المقابلة المرئية مع الحاج سيف بن عبد الله الحرمي في يوتيوب.

* من هم شيوخكم يا أبا عبدالله*

- إحنا لشيوخ. مالنا شيخ محمد وشيخ يابر (جابر) وشيخ عامر وشيخ صقر..

* النصور منهم*

النصور هذيله آل منصور.. تبع الشيخ منصور.

* أي صوب*

- الكابندي (منطقة) هذيله لشيوخ لوليين شيخ مذكور وشيخ ياسر وشيخ عبدالرسول مال نخل (تقي).. أول كله شيوخ.. واجدين (آل نصور وآل حرم).
إحنا تبع آل حرم وآل نصور من البساتين، الصفية، الزبار، البنود، الخرة، هذي تابع لنصور، التمبوات (منطقة) تمبوه تبع الحرم، العكابر تبع النصور، الفوارس تبع النصور. مناك صروباش وكشكنار وغويرزة تبع آل حرم. منا عسلوه، بيضخان، خنج تبع آل حرم. وجاه مبارك حدهم من بستانوه مشرق إلى حد بري الدكان. وبعد مناك غير المنصوري (قبيلة) وغيره وغيره. محددين كل محدد مكانه.
أعوام التفرق
آه.. وين ساروا.. ساروا.. الله يرحمهم.
كلهم ماتوا. تمو أعيالهم. شيخ عبدالله مات في الدوحة. مسكين، بعد شيوخ منهم ساروا إلى أبوظبي. وشيخ جبارة وكنعان. ما دري منو. كلهم ساروا. اطلعوا شيخ عبدالرسول وابنه شيخ محمد ساروا.
آه.. يا زمان سار. يا عبدالله.

* كيف كنتم تتعالجون*

- دكتر (دكتور) ما دكتر ما ميش. ما ميش دكاتره. ما ميش مدارس، تقرأ القران بس خلاص، اسم الدكتر ما يعرفونه. الدكتور وشي. جابوا هذا (سلمار) وشربوه. ولا نقعوا خلال. الحين لا! من واحد راسه عوره، قال يلا سير إلى ''غومسين'' هذا فاتح أو سير إلى كابندي. وش ما، قال سو عملية، وإذا ما فاد ''غومسين'' (مستشفى) قال في شيراز في شيراز هناك صوب شيراز فوق الجبل. الله لا يبارك في شيراز.
أول تأخذ ''من'' سمك يعني خمس كيلو سمك ''بغلوني'' واحد عبارة، مثلا خضرة طماط، ارويد، بقل. سير الزريبة وخذ بيع ما ميش، والا الحين هذي (قلمان) بخمسة مئة تومان.
راحوا.. آه.. أي على زمان أول.


* زمان الشورى عنكم كيف*

- لا. لا. ما يعرفون. ''شورى'' شلون قايل. في شرع. لين بغينا حاجة وإلا شيء، إما تستشير هذا وإلا هذا لا ما من.

* من يمثل الشرع عندكم*

- هذي تروح حق رئيس الأنصاف. بس الحاج وولده إسماعيل الله يرحمه، كله أنصار. قاعدين يسولفون عاقرين مع الناس. وإلا لول ما ميش.


* ما هو سر تغيير الأسماء والألقاب*

- مثلا ''محمدي'' لقب ما لنا. مثل ما تقول هذي إبراهيمي. هذي مثلا فلان غيره. هذا إللي يكتب السجل يسأل عن جدك... اسم أبوك... شسمه، بعدين يحط على اسم الجد. يا إبراهيمي يا محمدي يا إسماعيلي، يا غيره، يا غيره.


* ما هي قصة كشف الحجاب*

ـ استوى كشف الحجاب. شالوا روس الحريم قصوه، الريايل (الرجال) الدشاديش مالهم شقوه وزتوه، الوزار. لا يكون تلبس أوزار. القحفيه ''بهلوية''. وشلون قايله. القحفية البهلوية كانوا يجيبونها من بوشهر، يشترونها يجيبون قحافي كذا البس.
عقب قاموا يشترون (واركوت) عريضة. حطه على ظهرك واطلع. هذا زمنكم انتو. الله لا يبارك فيه الله خذاه (المقصود الشاه رضا بهلوي)، ياب الفتن. الولد (المقصود الشاه محمد بهلوي) حكم قال: كل من يلبس روحه. الناس ردوا قاموا يلبسون لبسهم. الريايل (الرجال). الحريم، افرحوا، هذي لنجة نصها اطلعوا راحوا.


* هل كان لديكم عَلم في الماضي*

- نشر ما ميش. نشر يعني علم ما ميش. إلا يوم طلع هذا الزطي هذا شفنا العلم هذا. وإلا لول علم ما ميش.

* من كان يحكم، الشيوخ أم الدولة*

- الزمن إللي قبل جيل لول، دولة ما ميش. عدلية ما ميش. كله اشيوخ يحكمون ، اشيوخ هذا إحنا تبع الحرم.

* شو قصة قصر البساتين العملاق*

- هذي يقولون الحاكم فيه حرمة. بنت تحكم فيه، وخاطبها ''فرهاد'' إيراني. ''فرهاد'' يبي ياخذها، قالت ''شيرين'' كان تبي آخذك ييب الماي من بلدة ''بيضخان'' ما دري من وين إلى ''البساتين'' يمشي من تحت القصر وباخذك.. ويقوم يقص الجبل، هذا الصوب.. ما تشوف الجبل مقصوص هذا هو قاصنه، جاو قالوا ''فرهاد'' وصل الماي، قالوا وصل وين قالوا هذا الصوب، قالوا وش حيلتهم، قالت لمو ''الهوش'' والأوادم وطلعوا قدامه وقولوا ''شيرين'' ماتت وساروا الناس قدامه، وقاموا يصفقون على روسهم وقال وش* قالوا ''شيرين'' ماتت! قال ماتت قام غل الفاس إللي يحفر فيه فوق وطاح فوق راسه، وفتكوا منه، حيلة فوق حيلة. هذيله لول ما شفناهم أما الوادي شفته هذي مقصوص.


* ما هي ذكرياتك مع الماضي*

- إبراهيم بن علي كان بيعرس في الرمس . ذاك الوقت يسوون طماشة، وسباق الخيول. أحمد بن إبراهيم عنده فرس ''ملحه'' يوم استوى (يعني السباق) اشقحت قالوا أحمد إبراهيم ''طاح'' من عليها. ويوم شافوا على ''لحضار'' إلا أحمد إبراهيم، عبر هو وياها. وبعده ملا عباس الله يرحمه وراه. حالة قبل، أما الحين، أحمد الخال مشاهد، أيه.. خيال، خيال.
زمن. أول بندر ''الحالة'' (المقصود نابند) عامر، عامر، وهذيله مال كنار خيم (بلده) ومال الزبار (بلدة) ومال البنود (بلدة) يجون ويسيرون مجلس أحمد بن إبراهيم يشربون ناريله. وإلا يتريقون (يفطرون) ويطوفون. تشوف المجلس مبطل يشربون قهوة وشاي. ويسيرون الحالة وبعدين يردون بيت أحمد بن إبراهيم. الحين محد يعرفه! أحمد إبراهيم هكو طايح. هذا الزمن!

* آخر كلامك يا بو عبدالله*

ندبت الطير عالي ..
أمس العصر راح.. واليوم الصبح جاني..
في ايده طبق قرطاس عطاني..
أول قرييه .. مندوب من الاحبابي ..
هذا شهرين أنا في الغوص.. أعاني..
يفرجها ربي الكريم العالي..
قلت روح ثريا وضرب شمالي..
لي قام يسير مسلوب العوالي..
للشراع قوموا يا رباعه..
حجينا العود على السيف يومي بذراعه..
مسكين بوسالم ارجع إلى محلك...
وان كان تبينا غير هالشهر قلنا...
اطبخ غدانا وقول يا أصبيان عليكم بالنيه...



وسلامتكم.

ايضاً بامكانكم مشاهدة القاء المرئي على قناة عرب الساحل في اليوتيوب

http://www.youtube.com/watch?v=wi520-FqgMk&feature=related
.....
http://www.youtube.com/watch?v=MTP9oKx587Y

ال بوخلف الحمادي
01-25-2010, 12:53 AM
الله يرضى عليك يا بوفهد

شوقتنا يالشيخ لو كتبت لنا الرابط علشان أنشوفه

تحياتي لك عزيزي

بوحمدان الخالدي
01-25-2010, 08:28 AM
اشكرك اخي بو فهد

والشكر موصول حق اخونا ابن الرمس ع المقابله الجميله


لك تحياتي

وليد جابر آل بوخلف
01-25-2010, 05:59 PM
بوفهد احسنت الاختيار و مشكور اخوي الكريم

و الله يحفظ السيد سيف عبدالله

غزلان التميمي
01-25-2010, 07:41 PM
اخــــــــــــــــوي بوفهــــــــــــــــــد





http://img213.imageshack.us/img213/8030/21966840wd2.gif

أم يوسف
01-25-2010, 09:02 PM
تسلم الشيخ على المقابلة الجميلة



واقتراحي لو نقلتها بالفصحى افضل دام انها مو منقوله صوت وصورة علشان يكون الكلام واضح اكثر




مجهود تشكر عليه



لك تحياتي

الظبيانية
01-25-2010, 10:14 PM
يعطيك العافيه أخوي بوفهد علي المقابله

أصمت بلغات
01-30-2010, 01:43 PM
جزاك الله خيراً

الحمـآدي
02-11-2010, 03:35 PM
كنـت أتمـنى إني اسوووي هالمقـابـلات مع شخصيـات قليلـة تتذكـر مـاضي جميـل تنسـينـاه ... مع

شخصيـات طغـى عليهـا جبروت الزمـان .. ----> صحفـي ^ - ^

ومـا شاء الله عمـره 88 سنـة وبعده يتذكـر كل هالأهـوال ... ----> الله يطـووول بعمـره ويعطيـه

الصحـة والعـافيـة ،،،

الشكـر لك أخووي " بوفهـد " والمـوصـول إلى أخووي " ابن الرمس " ع هالمقـابـلة ...

واسمحلي سرقت الأبيـات وحطيتهـا ف التوقيـع ----> :imim:

الخياط
02-11-2010, 05:03 PM
نعم هذا الفلج الى اشتغل وسوى فرهاد سمعنا عنة وشفنا ويمر حتى من جهمبارك

الله يعطى الشيخ سيف بن عبدالله الحرمي البالغ من العمر 88 عاماً الصحة والعاافية

اخوى بوفهد وفقت بالنقل والكتابة

الف الف شكر لجنابك الكريم

تحياتى

الخميس 26صفر 1431

أحمد الحوسني
04-18-2010, 05:58 PM
بارك الله فيك اخوي بوفهد

بوفلاح
04-18-2010, 06:12 PM
يعطيك العافيه أخوي بوفهد علي المقابله

لك اجمل تحيه

الفهد
04-18-2010, 08:59 PM
يعطيك الف عاافية اخوي بو فهد و عساك على القوة



لك تحياتي

الرحال
06-11-2010, 11:16 PM
تسلم والله يعطيكم العافيه

عطوور
04-14-2011, 01:52 AM
الف شكر اخوي
واتمنى المزيد من هل الاقاءات يعطيكم الف عافية

بوسعود سعيد
04-21-2011, 02:56 PM
مشكور يابوفهد وعساك عالقوه

الظبيانية
04-23-2011, 10:00 AM
سوالفه زمان حلوه و ماتمل ابد


لـــــــي الـــــــــــــرفـــــــــــع