وليد جابر آل بوخلف
01-25-2010, 09:29 PM
" مريم احمد عبدالله " في شهادتها على العصر
http://www.malak-qatar.org/uploads/f7e1eb319d.jpg
مريم احمد البالغه من العمر 84 عاماً و من اهالي و سكان قرية الدشتيه تروي لنا الحياة الاجتماعيه و السياسيه في الساحل الشرقي و بالتحديد في مناطق قبيلة النصور في تلك الحقبه من الزمن ، ايضاً يجب نشير بانه هالامرأه ، والدة الشيخ فاروق (شيخ اسلامي) باني و مؤسس مدرسة الدينيه في هالقريه و من الشيوخ الفضلاء اللذي قدم الكثير من العلماء و الطلبه الى المنطقه و الساحل الشرقي ...
نتمنى الاستفاده و الاستمتاع بهاللقاء الصحفي و نوعدكم بالمزيد من هاللقاءات و التقارير من الساحل الشرقي في سلسلة برنامج ( شاهد على العصر ) فقط على موقع عرب الساحل الرسمي :
( قام بهاللقاء احد اصدقائي الكرام ( بارسه ) من قرية الدشتيه و تم تدوين هاللقاء خلال 3 ايام اللي راح نعرض لكم مختصر منه ) .
بخليكم مع مريم احمد و صديقنا في هالتقرير :
بسم الله الرحمن الرحيم
منذ فتره كنت اتريا ام فاروق ترجع من الامارات حتى اجري معاها اللقاء ، و اخيراً رجعت من الامارات و رحت عدالها في الضحى ( قبل الظهر) و كانت نايمه في الليوان (الصاله) ، و من سمعت صوتي يلست من النوم و مديت يدي و سلمت عليها و حبيتها فوق راسها و هي ايضاً باستني على يدي و قعديت حذالها و بعد سوالف عاديه حطوا الغدى و تغدينا و ثم بديت اللقاء :
1- ام فاروق ممكن تعرفينا اكثر عليج ؟
* ( بالمزح قالت) ما تعرفني انا ؟ ... مريم احمد عبدالله محمد حاجي قاسم و امي اسمها نساء بنت عبدالرحمن محسن و نفس ما مذكور بالسجل (الجواز) لدي 84 عام و ان كان خطاء ام صحيح في ارقبت اللي كاتبينه .
2- كيف صحتج ام فاروق ؟
* الله اييرك من الشر، عندي سكري و ضغط و لازم دوم استفاد (استخدم) من الدواء و مب نفس قبل ما عندي حركه و طايحه في هالافراش ما اقدر اقوم على اركبي
3- متى تزوجتي و كم اعيال عندج؟
كنت بنت في الخامسه عشر من عمري و تزوجت مع ولد عمتي " الملا حرم " . و اعيالي هم : المرحومه فطوم ( توفت في الثلاثينات من عمرها ) و صغيه اللي توفت و هي طفله و ثم يبت فاروق ( معروف بأسم محمد فاروق ) و عقب يبت سعيده ولاكن توفت بعد ثلاث سنوات بضربة عين ، و عقب يب ساره ( زوجة عبدالرزاق ) و عقب آمنه ( زوجة عبدالرحمن ) و عقب حفصه ( ام الشيخ عبدالعزيز امام الجمعه الحالي لقرية الدشتيه )
4- سولفينا اكثر عن ايام طفولتج ، شو كنتوا تسوون؟
من طفولتي و انا اشتغل في بيت ابوي و اساعد البيت و نزرع و نحصد في الزريبه (المزرعه) و ايضاً ارعي الغنم و البقر .
موسم القيض كنا نعيش في النخل و الزرائب و الشتاء نرجع القرية ، و مع الايام يوم كبرت وصل عام القحط ، و عقب عام القحط تزوجت .
5- شو صار اللي تزوجتي مع الملا حرم؟
http://www.malak-qatar.org/uploads/12e502f9b6.jpg
(الملا حرم)
* الملا حرم قبل ما يزوجني كان عنده حرمه و اسمها " مقامي " و عندهم بنت و ولد ولاكن توفوا في الثانيه و الثالثه من عمرهم لذالك طلقها و تقدم حقي .
بما انه الملا حرم ولد اخت الوالد من تقدم حقي ، ابوي وافق و حتى من عادات الاوليين و الوالد انه ما يشاورون حد في امور الزواج .
المهم الوالد قال حق الملا حرم باجر تعال و املج على البنت و في اليوم الثاني قبل الملجه بساعه خبروني انه جهزي عمرج افلان بيملج عليج اليله .
6- الملا حرم شو كان يشتغل في الدوحه؟
* الملا حرم كان مأذن و خطيب في احد مساجد مدينة الريان اللي يصلي فيه احد شيوخ دولة قطر . طبعاً الملا حرم ما كان الامام الاول ولاكن يوم الامام يسافر او يغيب الملا حرم يتقدم فيهم .
اذكر مره زوجة الشيخ كانت مسويه عزيمه و حريم وايد مشاركات في هالضيافه ، انا بعد رحت و شفت مرت الشيخ خليفه ( ام الشيخ حمد ، حاكم قطر الحالي) متواجده و يالسه معانا على سفره وحده .
7- كما سمعنا انه الملا حرم قرر ان يستقر في الدوحه و ياخذج الى هناك ولاكن انتي رافضه ؟
* صحيح . مره يوم كنا هناك لمدت 6 شهور ، شيخ اللي كان يصلي في مسجد اللى الملا حرم فيه امام ، قال حق الملا حرم انه لا تروح فارس و تم اهنا و بعطيك جواز و كل شي ولاكن انا لانه بناتي و اخواني و ابوي في فارس رفضت و قلت ما اقدر استحمل بعدهم .
8- ممكن تسولفينا اكثر عن حياتكم في قطر؟
* نفس ما قلت لكم الشيخ عاطي الملا حرم بيت هناك و كنا انسير و نرجع يعني نعيش اهناك و اهنا و يوم الملا حرم خبرني انه الشيخ قايله تم اهنا و استقر و بعطيك جواز ، انا لاسباب اللي قلتها لكم رفضت لانه ما كنت اتحمل بٌعد الاهل .
9- في طولت حياتج اي مدن زرتيهم و سافرتي اليهم؟
شيراز ، بندر عباس ، جزيرة جسم ، الامارات ، لنجه ، قطر ، السعوديه ، الرياض
10- منو من احفادج اكثر يزورج و يهتم فيج؟
* كلهم زينين و يزوروني دوم ولاكن عبدالصمد و عبدالجبار و عبدالغني اكثر مهتمين فيني .
11- مع انه اسم " محمد فاروق " ما كان رايج في المنطقه ، شو صار اللي اختاريتوا هالاسم الحلو حق ولدكم؟ و منو اللي اختاره؟
* اخوي كان يدرس في بيخ كوش ( منطقه في المقام) عند الشيخ احمد نور من اهالي نخل خلفان و يوم رجع كان لي 9 شهور و حامله و كنت رايحه بيت فاطمه عبدالله احمد حتى اعزيهم على فقدان ولدهم و هناك ربيت و يوم عرفت انه ولد فرحت وايد لانه اعيالنا كلهن بنات و هذا اول ولد و الملا حرم قال بسميه " عبدالقادر " او " عبدالرحمن" ولاكن اخوي لانه ولد الشيخ احمد نور اسمه " محمد فاروق " قال بنسميه على اسم ولد احمد نور .
عقب قالوا بنسوي قرعه و بنكتب الثلاث اسامي على ثلاث اوراق و بنختار و اي اسم يطلع راح نختاره للمولود .
و كتبوا الثلاث اسماء و طلبوا من بنتي الصغيره فطوم حتى تختار احد الاورق وفطوم اختارت و الملا حرم فتح الورقه و ابتسم قال الاسم هو " محمد فاروق " و من اول عادوا القرعه و ايضاً مره ثانيه طلع " محمد فاروق " و هكذا اختارينا هالاسم .
11- عن طفولة " محمد فاروق " خبرينا و وين درس؟
في البدايه تعلم كم جزء من القران عند ابوه و يوم ابوه سافر قطر وديته المكتب عند عائشه عبدالخالق و عقب وديته عند عبدالرحمن محمود و ختم القران عنده و في 15 عام من عمره سار مدرسة دينيه في لنجه و بقا هناك 5 سنوات و درس تحت يد الشيخ محمد علي ( سلطان العلماء خالدي ) اللي موجود في دبي الحين .
12- ام فاروق ممكن تخبرينا عن ايام القحط ؟ شو صار فيكم بالضبط؟
* الملا حرم في البحرين كان حلمان في نجمة لها اضائات و سائل احد المفسرين هناك و قايله انه القحط ياي و بعد كم سنه الناس زرعوا جميع بذر الحب و الاشعير اللي عندهم وبسبب عدم هطول الامطار مات البذر و ما طلع ، و عقب يوم الامطار هطلت الناس ما كان عندهم حب و اشعير و كله باذرينه قبل . و تحملنا 7 سنوات من الجوع و القحط و ماتوا الكثير . في ذيج الايام ايضاً طلع ذيب يقطع رأس الناس من جسدهم و ذاك العام معروف بعام الذيب .
13- هل صحيح انه ايام القحط كنتوا تاكلون الجراده ؟
* حتى الحين لو نحصل بناكل ، الجراد لذيذ و ماله خص في عام القحط و غيره و الناس ياكلونه دوم .
اذكر قبل الجراد كان كثير لدرجه اللي نترس اليونيه (الخيشه ) و عقب نحط جدر متروس ماي على الضو و يوم الماي يفور (يسخن) على السريع نفتح اليونيه و نفرغ الجراد في الجدر و عقب يوم ينضى نحط الجراد في الشمس حتى ييبس و عقب نطيب (نقطع) جناحه و ناكله بأي شكل نحب .
14- زين بما انه النخيل كثير بالمنطقه ليش الناس ما كان عندهم تمر ايام القحط؟
*اولاً النخيل ما كان كثير وايد و ثانياً لانه الناس غير التمر ما كان عندهم شي و التمر حد ما كان وايد لابد منه بيخلص خلال شهور . و الناس كانوا يشبعون روحهم في التمر .
15- زين الذيب اللي هاجم الناس في ايام القحط هل قتل حد ؟
* هيه نعم ، بنت محمد كوسه اللي كان لها 10 سنين ، و اخو يوسف محمد ، و ابو عبدالرحمن ، و ولد محمد يعقوب مال القابنديه ، عم عبدالرحمن مكاري و كان له 4 او 5 سنوات و في يوم الثاني حصلوا اثيابه و شعر راسه في يونيه (خيشه ) .
آمنه كناري مال قرية يرد خلف ، طبعاً الذيب هاجم وايدين و اجرحهم
16- زين هالقصه لين متى طولت ؟ و متى افتكيتوا من الذيب ؟
* اعتقد ثلاث سنوات ، و هالذيب كان يهاجم جميع القرى المجاوره و مب بس الدشتيه و في احد الايام في زريبة الحاج عبدالرحمن عبدالجبار في قرية بمبري كان ياكل جثت حيوان في الطوي (البئر ) و منحشك ( محاصر) و ما قادر يطلع و عقب كم نفر ساروا و جتلوه ( قتلوه ) في تفك (بندقيه) و افتكينا منه .
17- ام فاروق ما هي اقدم طوائف الدشتيه؟
* البو الحاج قاسم ، و قوم الرئيس اللي محد بقا منهم الا ام احمد الرئيس .
18- ام فاروق ابغي اسألج عن اصل و نسب شيوخ النصور ؟
* الشيوخ في الاصل من البحرين وصلوا المنطقه ، و جميع العبيد ( سمر البشره) اللي موجودين بالمنطقه هذيل احفاد كم حرمه و كم رجال كانوا خدام الشيوخ و يايبينهم من افريقيا . اول شيخ اللي هو والد جميع النصور اسمه الشيخ مذكور و كان يعيش في كلات الحمراء و عقب بسبب استعمال الصكوك النقديه بأسمه تم نقله الى شيراز و اعدموه هناك . الشيخ مذكور كان عنده ولد واحد و اسمه حسن .
الشيخ مذكور قبل الاعدام سائلينه شو تبغي قبل الاعدام ؟ قال ابغي اشوف ولدي الشيخ حسن حتى اوصيه بشي .
و الشيخ حسن ودوه الى شيراز و اهناك الشيخ مذكور قايله انه جميع هالمصائب و البلاوي اللي يت على راسي من ورا قوم الرئيس مال الدشتيه و اللي ابغيه منك انه ما تخليهم يتهنون بحياتهم و اقطع نسلهم .
و عقب سنين الشيخ حسن لتنفيذ وصية والده قتل اربعه من قوم الرئيس قريب قرية شيووه و عقب سنين ابن احد هالاربعه بأسم " رستم " راح بيت عمته ليخطب بنت عمته ، ولاكن عمته قالت له : انت ما تستحي ؟ للحين ما انتقمت و ما اخذت ثار ابوك و عمامك و تبغي تتزوج؟ .
لذالك رستم الرئيسي انصرف من الزواج و حاول التقرب من الشيخ حسن و بما انه انسان شجاع و فارس معروف ، الشيخ حسن اتخذه كاحد حراسه . و الشيخ حسن عباله رستم ناسي مقبل ابوه و عمامه .
بعد سنين في ليله من اليالي رستم قايل لجميع افراد قبيلته انه اليله بقتل الشيخ حسن و انتم جهزوا اغراضكم و اذا سمعتوا صوت رصاصه وحده اعرفوا اني قدرت اقتله و ايضاً انا نجيت و اذا سمعتوا صوت رصاص اكثر اعرفوا انه انا ايضاً قتلت و انتوا فرو بواسطة لنج اللي مجهزنه حقكم في بندر الخرابه الى الخارج .
على اي حال رستم كالعاده حضر في مجلس الشيخ ولاكن الارتباك و الاضطراب كان واضح بويها . و الشيخ قاله وش فيك يا رستم؟ رستم قال بطني يعورني و شويه مريض.
الشيخ امر الخدم حتى اييبون لرستم شربت ماي لومي ( شربت ليمون ) و الشيخ حسن ترك المجلس و سار حجرة النوم حتى يرتاح و يرقد . في طابق الثاني رستم زرق ( اطلق النار ) على الشيخ و ضربته في قلبه و الشيخ صرخ و قال: الحقو رستمو جتلني (قتلني) .
رستم بعدها شرد ولاكن بدال ان ينقز برع القلعه ، طب ( نقز ) داخل القلعه و الحراس وصلوا و رشوه بالرصاص و يقولون اربعين رصاصه لاخينه (ضاربينه) .
و يوم الثاني بعد ما صلوا و دفنوا الشيخ ، حرقوا جسد رستم في الضو.
الشيخ حسن كان عنده اربع اولاد: 1- الشيخ مذكور 2- الشيخ عبدالله 3- الشيخ يوسف 4- و الشيخ حاتم و بعد مقتل الشيخ حسن ابنه الاكبر الشيخ مذكور الثاني قعد على الحكم .
الشيخ مذكور الثاني كان عنده ولدين بأسم : " الشيح ياسر " و " الشيخ حارب "
و الشيخ عبدالله كان عنده ولد واحد باسم : " الشيخ احمد "
و الشيخ يوسف ايضاً عنده ولد واحد باسم : " الشيخ حسن " ولاكن الشيخ حاتم ما كان عنده ولد .
20- شو سبب الخلاف بين الشيوخ و طائفة الرئيس؟
* ماعرف السبب بالضبط ولاكن اعتقد لانه الشيوخ يايين من البحرين و ماخذين حكم المنطقه و ايضاً ماخذين جميع الاراضي و الاملاك ولاكن طائفة الرئيس اللي من سكان القدماء للمنطقه و القريه كانوا يبغون ياخذون الحكم و يكونون الكل بالكل .
لذلك كانوا يخالفون اوامر الشيوخ و دوم كان بينهم خلافات .
21- بعد مقتل الشيخ حسن و رستم الرئيسي هل الاختلافات انتهت؟
* لا . الاختلافات امتدت حتى لم يبقيا احد من طائقة الرئيس في الدشتيه . جميع طائفة الرئيس يا اما قتلوا والا هاجروا من المنطقه .
كم عائلة من الرئيس نفس عائلة عبدالله سلطان الرئيسي هاجروا الى سامان غرب ( صوب كنقون) و بما انه عندهم نخيل كثيره في الدشتيه كانوا يخافون اييون يخرفون نخلهم و موكلين شخص من قوم حسن جمال حتى يهتم في النخيل و يخرف و يشل قسم من التمر بعنوان حق الزحمه و الباقي يندبه لهم .
على العموم بعد مقتل الشيخ حسن و رستم الجميع فكر بانه الفتنه و الاختلافات انتهت حتى بعد سنين ، علي سلطان من قوم الرئيس اللي كان مقيم في قرية صروباش قايل حق عبدالغني ( غريس في نخلهم ) انه محتاج تفك و ابغيك تدور حقي .
بعد كم يوم عبدالغني يسير حق علي سلطان و يقوله انه الحاج يوسف مهمدي راجع من البحرين و يايب معه كم نوع من الاتفاقه (بندقيات ) و ما نعرف انت اي نوع تبغي لذالك ابغيك اتي بيتنا و انا بيب لك الاقفاقه من بيت الحاج يوسف و انت شوف اللي تيوزها ( اللي تعجبك ) اخذها .
علي سلطان غافل من انه عبدالغني يبغي يخون فيه و انه جاسوس الشيخ ، ركب احمارته و راح الدشتيه و من دخل بيت عبدالغني اكثر من 10 اشخاص زرقوا (طلقوا النار ) عليه من الدهريز ( الحجرة الاماميه للباب في القديم يسمونها دهريز ) و جتلوه ( قتلوه ) .
اللي ابغي اقولكم من القصه انه الانقامات كانت مستمره حتى لم يبقي ولا واحد من عائلة الرئيس في الدشتيه .
22- اجلعة (قلعة ) الدشتيه تابعه حق امنو؟
* اجلعة القديمه تابعه للشيخ مذكور الاول و كان يعيش في كلات الحمراء و هالاجلعه و ايضاً عنده اجلعة في القابنديه و بعده ابنه الشيح حسن ايضاً سكن فيها .
ولاكن اجلعة الجديده تابعه للشيخ مذكور الثاني .
23- عن ايام الشيوخ اكيد الكلام وايد ولاكن انا ماعرف شو اسألج . شو رايج انتي بروحج تخبرينا عن اللي تذكرينه؟
* الشيخ مذكور الاول كان غير زوجته الاصليه و ام اعياله اللي كانت متواجده في القلعه على اخر عمره تزوج بنت من الاتراك (تركيه) و ايضاً اخذ كم فارس شجاع من اهلها و خلاهم من ضمن جنوده .
يوم اللي قبضوا على الشيخ في كلات الحمراء و قبل نقله الى شيراز ودع عائلته و مرافقينه في القلعه و ثم طلب من مأمورين الدوله حتى يسمحون له لتوديع زوجته الثانيه (التركيه) .
على العموم الشيخ مذكور امجتف ( مكتوف الايادي ) كان يمشي جدا و ما يقارب 200 شخص من مرافقينه و مأمورين الدوله و الناس خلفه يمشون في سكيك الدشتيه متجهين نحو بيت زوجته لتوديعها .
و عقب شهور اعدموه في شيراز .
يوم اللي تم نقل الشيخ مذكور الى شيراز عبدالرحمن خاكي اللي كان بصفة باكارفي قرية الدشتيه راح الاجلعه و ترس اربع ابيابه (علبه ) من الصكوك اللي الشيخ روحه صانعنهم و حطه فوق الجمل و وداهم بيته حتى يحتفظ فيهم لين يرجع الشيخ مذكور .
25- عن سالفة مساعدة ابو الشيخ جباره حق عدد من سكان الدشتيه اللي مركبهم كان خراب اذكر سولفتي حقي من قبل ، ياليت تخبريني عنها مره ثانيه !
* هيه ، في يوم من الايام عدد من سكان الدشتيه فوق مركبهم الشراعي كان ناويين يروحون عابادان ولاكن قريب احد قرى منطقة كنقون لنجتهم اختربت و راحوا الى الساحل و ما كان عندهم شي ياكلونه لذالك " الملا حرم " (زوجها ) قال انه انا بكتب قصيده في وصف احد شيوح القريه و ابغيكم توصلونها له .
المهم الملا حرم يلس تحت شجرة الروله وحيداً و كتب قصيده جميله في وصف شيخ تلك القريه و ثم ندب ( طرش ) عبدالرحمن ابراهيم و شخص اخر مع القصيده الى القريه ( اعتقد قرية عيننات ) . و عبدالرحمن ابراهيم وصل القصيده الى الشيخ و شرح قصتهم . الشيخ استانس كثير بقرائت القصيده و بعدها شل 13 تومان مع قلتتين تمر و عطاهم .
الملا حرم كان يسولف لي و يقول بأنه بعد ساعات شفت شخصين مع زبيلين كبار( سله من خوص النخل ) فوق راسهم يايين صوبي و من الفرحه يركضون .
25 - شو كان احساسج اول ما شفتي الرادو ( الراديو ) ؟
* تقريباً قبل 50 سنه " الملا حرم " كان راجع من البحرين و قال بانه في البحرين طالعه حديده و تتحجا ( تتكلم ) ، انا ما صدقت حتى في يوم من الايام عند ما ولدي فاروق كان عمره تقريباً سنه رحت مع الملا حرم الى قرية الاهشوم و في اليل باتينا ( بقينا ) بيت واحد من الربع . و يوم الملا حرم رجع من صلاة النوم ، قالي اذا تبغين تشوفين ذيج الحديده اللي تتكلم تعالي معي .
انا شليت فاروق و الملا حرم مسك يد بنتنا فطوم و رحنا حتى وصلنا الى بيت كان فوق الينز (فوق البيت) ناس وايدين و كان ايي صوت ، الملا حرم قالي هذا صوت الحديده اللي خبرتج عنه و اذكر وقفنا في السكه اكثر من ساعه و نسمع الصوت و كنا مستغربين و فوق الينز ( فوق سقف البيت ) كانوا اكثر من 15 شخص و يسمعون الرادو .
26 - زين شو ذكرياتج من مشاهدة اول سياره ؟
* انا شايفه السياره قبل الرادو ، يعني قبل 74 سنه عند ما كنت في العاشره من عمري اذكر الشيخ سيف اللي كان يسكن في قلعة الدشتيه كان عنده سياره جيب خضره و دوم كانت واقفه تحت اشجره جدام القلعه . انا و باقي البنات كنا نروح و من بعيد نطالع السياره و كنا ننتظر حتى نشوف كيف تشتغل و يوم تتحرك كنا نركض خلف السياره و فرحانيين و كنا نستانس يوم نشوفها تمشي .
27- زين شو تذكرين من مشاهدة اول طائره؟
* الصراحه انا ماذكر شي ولاكن امي كانت تسولف و تقول انه اول ما تزوجت الناس سامعين صوت غريب من السماء و الناس من خوف انه غضب من رب العالمين الكل يشرد و يدخل البيت و يقفل على نفسه و يوم الصوت خلص الناس طلعوا برع و الكل يتسائل عن مصدر الصوت و الكل يقول شي و اكثرهم كانوا يعتقدون بأنه عضب من رب العالمين ولاكن بعد فتره الناي قاموا يقولون انه الصوت كان صوت ( بالول ) اللي كان سامعين اشياء عنه . بالول اسم الهليكبتر قديماً و الناس اللي كان اييون من الخارج يسولفون حقنا . اعتقد اسم بالول مأخوذه من اسم بالون .
28 - مشكوره ام فاروق على اللقاء الشيق ولاكن كآخر سؤال نحب نعرف شو هي امنياتج ؟
* شو اقولك !؟ في هالدنيا ما بقالي شي حلو حتى اتمناه . ولاكن اطلب الجنه من الله في ذيج الدنيا . فاروق و فطوم راحوا ، ساره راحت دبي و ابتعدت عني ، و في الغربه زوجها و ابو اعيالها اتوفى ، آمنه بعد الله ما رزقها باعيال و من اعيالي بس بنتي حفصه موجوده عندي في القريه و الحمد لله راضيه يوم اشوفها مستانسه
http://www.malak-qatar.org/uploads/f7e1eb319d.jpg
مريم احمد البالغه من العمر 84 عاماً و من اهالي و سكان قرية الدشتيه تروي لنا الحياة الاجتماعيه و السياسيه في الساحل الشرقي و بالتحديد في مناطق قبيلة النصور في تلك الحقبه من الزمن ، ايضاً يجب نشير بانه هالامرأه ، والدة الشيخ فاروق (شيخ اسلامي) باني و مؤسس مدرسة الدينيه في هالقريه و من الشيوخ الفضلاء اللذي قدم الكثير من العلماء و الطلبه الى المنطقه و الساحل الشرقي ...
نتمنى الاستفاده و الاستمتاع بهاللقاء الصحفي و نوعدكم بالمزيد من هاللقاءات و التقارير من الساحل الشرقي في سلسلة برنامج ( شاهد على العصر ) فقط على موقع عرب الساحل الرسمي :
( قام بهاللقاء احد اصدقائي الكرام ( بارسه ) من قرية الدشتيه و تم تدوين هاللقاء خلال 3 ايام اللي راح نعرض لكم مختصر منه ) .
بخليكم مع مريم احمد و صديقنا في هالتقرير :
بسم الله الرحمن الرحيم
منذ فتره كنت اتريا ام فاروق ترجع من الامارات حتى اجري معاها اللقاء ، و اخيراً رجعت من الامارات و رحت عدالها في الضحى ( قبل الظهر) و كانت نايمه في الليوان (الصاله) ، و من سمعت صوتي يلست من النوم و مديت يدي و سلمت عليها و حبيتها فوق راسها و هي ايضاً باستني على يدي و قعديت حذالها و بعد سوالف عاديه حطوا الغدى و تغدينا و ثم بديت اللقاء :
1- ام فاروق ممكن تعرفينا اكثر عليج ؟
* ( بالمزح قالت) ما تعرفني انا ؟ ... مريم احمد عبدالله محمد حاجي قاسم و امي اسمها نساء بنت عبدالرحمن محسن و نفس ما مذكور بالسجل (الجواز) لدي 84 عام و ان كان خطاء ام صحيح في ارقبت اللي كاتبينه .
2- كيف صحتج ام فاروق ؟
* الله اييرك من الشر، عندي سكري و ضغط و لازم دوم استفاد (استخدم) من الدواء و مب نفس قبل ما عندي حركه و طايحه في هالافراش ما اقدر اقوم على اركبي
3- متى تزوجتي و كم اعيال عندج؟
كنت بنت في الخامسه عشر من عمري و تزوجت مع ولد عمتي " الملا حرم " . و اعيالي هم : المرحومه فطوم ( توفت في الثلاثينات من عمرها ) و صغيه اللي توفت و هي طفله و ثم يبت فاروق ( معروف بأسم محمد فاروق ) و عقب يبت سعيده ولاكن توفت بعد ثلاث سنوات بضربة عين ، و عقب يب ساره ( زوجة عبدالرزاق ) و عقب آمنه ( زوجة عبدالرحمن ) و عقب حفصه ( ام الشيخ عبدالعزيز امام الجمعه الحالي لقرية الدشتيه )
4- سولفينا اكثر عن ايام طفولتج ، شو كنتوا تسوون؟
من طفولتي و انا اشتغل في بيت ابوي و اساعد البيت و نزرع و نحصد في الزريبه (المزرعه) و ايضاً ارعي الغنم و البقر .
موسم القيض كنا نعيش في النخل و الزرائب و الشتاء نرجع القرية ، و مع الايام يوم كبرت وصل عام القحط ، و عقب عام القحط تزوجت .
5- شو صار اللي تزوجتي مع الملا حرم؟
http://www.malak-qatar.org/uploads/12e502f9b6.jpg
(الملا حرم)
* الملا حرم قبل ما يزوجني كان عنده حرمه و اسمها " مقامي " و عندهم بنت و ولد ولاكن توفوا في الثانيه و الثالثه من عمرهم لذالك طلقها و تقدم حقي .
بما انه الملا حرم ولد اخت الوالد من تقدم حقي ، ابوي وافق و حتى من عادات الاوليين و الوالد انه ما يشاورون حد في امور الزواج .
المهم الوالد قال حق الملا حرم باجر تعال و املج على البنت و في اليوم الثاني قبل الملجه بساعه خبروني انه جهزي عمرج افلان بيملج عليج اليله .
6- الملا حرم شو كان يشتغل في الدوحه؟
* الملا حرم كان مأذن و خطيب في احد مساجد مدينة الريان اللي يصلي فيه احد شيوخ دولة قطر . طبعاً الملا حرم ما كان الامام الاول ولاكن يوم الامام يسافر او يغيب الملا حرم يتقدم فيهم .
اذكر مره زوجة الشيخ كانت مسويه عزيمه و حريم وايد مشاركات في هالضيافه ، انا بعد رحت و شفت مرت الشيخ خليفه ( ام الشيخ حمد ، حاكم قطر الحالي) متواجده و يالسه معانا على سفره وحده .
7- كما سمعنا انه الملا حرم قرر ان يستقر في الدوحه و ياخذج الى هناك ولاكن انتي رافضه ؟
* صحيح . مره يوم كنا هناك لمدت 6 شهور ، شيخ اللي كان يصلي في مسجد اللى الملا حرم فيه امام ، قال حق الملا حرم انه لا تروح فارس و تم اهنا و بعطيك جواز و كل شي ولاكن انا لانه بناتي و اخواني و ابوي في فارس رفضت و قلت ما اقدر استحمل بعدهم .
8- ممكن تسولفينا اكثر عن حياتكم في قطر؟
* نفس ما قلت لكم الشيخ عاطي الملا حرم بيت هناك و كنا انسير و نرجع يعني نعيش اهناك و اهنا و يوم الملا حرم خبرني انه الشيخ قايله تم اهنا و استقر و بعطيك جواز ، انا لاسباب اللي قلتها لكم رفضت لانه ما كنت اتحمل بٌعد الاهل .
9- في طولت حياتج اي مدن زرتيهم و سافرتي اليهم؟
شيراز ، بندر عباس ، جزيرة جسم ، الامارات ، لنجه ، قطر ، السعوديه ، الرياض
10- منو من احفادج اكثر يزورج و يهتم فيج؟
* كلهم زينين و يزوروني دوم ولاكن عبدالصمد و عبدالجبار و عبدالغني اكثر مهتمين فيني .
11- مع انه اسم " محمد فاروق " ما كان رايج في المنطقه ، شو صار اللي اختاريتوا هالاسم الحلو حق ولدكم؟ و منو اللي اختاره؟
* اخوي كان يدرس في بيخ كوش ( منطقه في المقام) عند الشيخ احمد نور من اهالي نخل خلفان و يوم رجع كان لي 9 شهور و حامله و كنت رايحه بيت فاطمه عبدالله احمد حتى اعزيهم على فقدان ولدهم و هناك ربيت و يوم عرفت انه ولد فرحت وايد لانه اعيالنا كلهن بنات و هذا اول ولد و الملا حرم قال بسميه " عبدالقادر " او " عبدالرحمن" ولاكن اخوي لانه ولد الشيخ احمد نور اسمه " محمد فاروق " قال بنسميه على اسم ولد احمد نور .
عقب قالوا بنسوي قرعه و بنكتب الثلاث اسامي على ثلاث اوراق و بنختار و اي اسم يطلع راح نختاره للمولود .
و كتبوا الثلاث اسماء و طلبوا من بنتي الصغيره فطوم حتى تختار احد الاورق وفطوم اختارت و الملا حرم فتح الورقه و ابتسم قال الاسم هو " محمد فاروق " و من اول عادوا القرعه و ايضاً مره ثانيه طلع " محمد فاروق " و هكذا اختارينا هالاسم .
11- عن طفولة " محمد فاروق " خبرينا و وين درس؟
في البدايه تعلم كم جزء من القران عند ابوه و يوم ابوه سافر قطر وديته المكتب عند عائشه عبدالخالق و عقب وديته عند عبدالرحمن محمود و ختم القران عنده و في 15 عام من عمره سار مدرسة دينيه في لنجه و بقا هناك 5 سنوات و درس تحت يد الشيخ محمد علي ( سلطان العلماء خالدي ) اللي موجود في دبي الحين .
12- ام فاروق ممكن تخبرينا عن ايام القحط ؟ شو صار فيكم بالضبط؟
* الملا حرم في البحرين كان حلمان في نجمة لها اضائات و سائل احد المفسرين هناك و قايله انه القحط ياي و بعد كم سنه الناس زرعوا جميع بذر الحب و الاشعير اللي عندهم وبسبب عدم هطول الامطار مات البذر و ما طلع ، و عقب يوم الامطار هطلت الناس ما كان عندهم حب و اشعير و كله باذرينه قبل . و تحملنا 7 سنوات من الجوع و القحط و ماتوا الكثير . في ذيج الايام ايضاً طلع ذيب يقطع رأس الناس من جسدهم و ذاك العام معروف بعام الذيب .
13- هل صحيح انه ايام القحط كنتوا تاكلون الجراده ؟
* حتى الحين لو نحصل بناكل ، الجراد لذيذ و ماله خص في عام القحط و غيره و الناس ياكلونه دوم .
اذكر قبل الجراد كان كثير لدرجه اللي نترس اليونيه (الخيشه ) و عقب نحط جدر متروس ماي على الضو و يوم الماي يفور (يسخن) على السريع نفتح اليونيه و نفرغ الجراد في الجدر و عقب يوم ينضى نحط الجراد في الشمس حتى ييبس و عقب نطيب (نقطع) جناحه و ناكله بأي شكل نحب .
14- زين بما انه النخيل كثير بالمنطقه ليش الناس ما كان عندهم تمر ايام القحط؟
*اولاً النخيل ما كان كثير وايد و ثانياً لانه الناس غير التمر ما كان عندهم شي و التمر حد ما كان وايد لابد منه بيخلص خلال شهور . و الناس كانوا يشبعون روحهم في التمر .
15- زين الذيب اللي هاجم الناس في ايام القحط هل قتل حد ؟
* هيه نعم ، بنت محمد كوسه اللي كان لها 10 سنين ، و اخو يوسف محمد ، و ابو عبدالرحمن ، و ولد محمد يعقوب مال القابنديه ، عم عبدالرحمن مكاري و كان له 4 او 5 سنوات و في يوم الثاني حصلوا اثيابه و شعر راسه في يونيه (خيشه ) .
آمنه كناري مال قرية يرد خلف ، طبعاً الذيب هاجم وايدين و اجرحهم
16- زين هالقصه لين متى طولت ؟ و متى افتكيتوا من الذيب ؟
* اعتقد ثلاث سنوات ، و هالذيب كان يهاجم جميع القرى المجاوره و مب بس الدشتيه و في احد الايام في زريبة الحاج عبدالرحمن عبدالجبار في قرية بمبري كان ياكل جثت حيوان في الطوي (البئر ) و منحشك ( محاصر) و ما قادر يطلع و عقب كم نفر ساروا و جتلوه ( قتلوه ) في تفك (بندقيه) و افتكينا منه .
17- ام فاروق ما هي اقدم طوائف الدشتيه؟
* البو الحاج قاسم ، و قوم الرئيس اللي محد بقا منهم الا ام احمد الرئيس .
18- ام فاروق ابغي اسألج عن اصل و نسب شيوخ النصور ؟
* الشيوخ في الاصل من البحرين وصلوا المنطقه ، و جميع العبيد ( سمر البشره) اللي موجودين بالمنطقه هذيل احفاد كم حرمه و كم رجال كانوا خدام الشيوخ و يايبينهم من افريقيا . اول شيخ اللي هو والد جميع النصور اسمه الشيخ مذكور و كان يعيش في كلات الحمراء و عقب بسبب استعمال الصكوك النقديه بأسمه تم نقله الى شيراز و اعدموه هناك . الشيخ مذكور كان عنده ولد واحد و اسمه حسن .
الشيخ مذكور قبل الاعدام سائلينه شو تبغي قبل الاعدام ؟ قال ابغي اشوف ولدي الشيخ حسن حتى اوصيه بشي .
و الشيخ حسن ودوه الى شيراز و اهناك الشيخ مذكور قايله انه جميع هالمصائب و البلاوي اللي يت على راسي من ورا قوم الرئيس مال الدشتيه و اللي ابغيه منك انه ما تخليهم يتهنون بحياتهم و اقطع نسلهم .
و عقب سنين الشيخ حسن لتنفيذ وصية والده قتل اربعه من قوم الرئيس قريب قرية شيووه و عقب سنين ابن احد هالاربعه بأسم " رستم " راح بيت عمته ليخطب بنت عمته ، ولاكن عمته قالت له : انت ما تستحي ؟ للحين ما انتقمت و ما اخذت ثار ابوك و عمامك و تبغي تتزوج؟ .
لذالك رستم الرئيسي انصرف من الزواج و حاول التقرب من الشيخ حسن و بما انه انسان شجاع و فارس معروف ، الشيخ حسن اتخذه كاحد حراسه . و الشيخ حسن عباله رستم ناسي مقبل ابوه و عمامه .
بعد سنين في ليله من اليالي رستم قايل لجميع افراد قبيلته انه اليله بقتل الشيخ حسن و انتم جهزوا اغراضكم و اذا سمعتوا صوت رصاصه وحده اعرفوا اني قدرت اقتله و ايضاً انا نجيت و اذا سمعتوا صوت رصاص اكثر اعرفوا انه انا ايضاً قتلت و انتوا فرو بواسطة لنج اللي مجهزنه حقكم في بندر الخرابه الى الخارج .
على اي حال رستم كالعاده حضر في مجلس الشيخ ولاكن الارتباك و الاضطراب كان واضح بويها . و الشيخ قاله وش فيك يا رستم؟ رستم قال بطني يعورني و شويه مريض.
الشيخ امر الخدم حتى اييبون لرستم شربت ماي لومي ( شربت ليمون ) و الشيخ حسن ترك المجلس و سار حجرة النوم حتى يرتاح و يرقد . في طابق الثاني رستم زرق ( اطلق النار ) على الشيخ و ضربته في قلبه و الشيخ صرخ و قال: الحقو رستمو جتلني (قتلني) .
رستم بعدها شرد ولاكن بدال ان ينقز برع القلعه ، طب ( نقز ) داخل القلعه و الحراس وصلوا و رشوه بالرصاص و يقولون اربعين رصاصه لاخينه (ضاربينه) .
و يوم الثاني بعد ما صلوا و دفنوا الشيخ ، حرقوا جسد رستم في الضو.
الشيخ حسن كان عنده اربع اولاد: 1- الشيخ مذكور 2- الشيخ عبدالله 3- الشيخ يوسف 4- و الشيخ حاتم و بعد مقتل الشيخ حسن ابنه الاكبر الشيخ مذكور الثاني قعد على الحكم .
الشيخ مذكور الثاني كان عنده ولدين بأسم : " الشيح ياسر " و " الشيخ حارب "
و الشيخ عبدالله كان عنده ولد واحد باسم : " الشيخ احمد "
و الشيخ يوسف ايضاً عنده ولد واحد باسم : " الشيخ حسن " ولاكن الشيخ حاتم ما كان عنده ولد .
20- شو سبب الخلاف بين الشيوخ و طائفة الرئيس؟
* ماعرف السبب بالضبط ولاكن اعتقد لانه الشيوخ يايين من البحرين و ماخذين حكم المنطقه و ايضاً ماخذين جميع الاراضي و الاملاك ولاكن طائفة الرئيس اللي من سكان القدماء للمنطقه و القريه كانوا يبغون ياخذون الحكم و يكونون الكل بالكل .
لذلك كانوا يخالفون اوامر الشيوخ و دوم كان بينهم خلافات .
21- بعد مقتل الشيخ حسن و رستم الرئيسي هل الاختلافات انتهت؟
* لا . الاختلافات امتدت حتى لم يبقيا احد من طائقة الرئيس في الدشتيه . جميع طائفة الرئيس يا اما قتلوا والا هاجروا من المنطقه .
كم عائلة من الرئيس نفس عائلة عبدالله سلطان الرئيسي هاجروا الى سامان غرب ( صوب كنقون) و بما انه عندهم نخيل كثيره في الدشتيه كانوا يخافون اييون يخرفون نخلهم و موكلين شخص من قوم حسن جمال حتى يهتم في النخيل و يخرف و يشل قسم من التمر بعنوان حق الزحمه و الباقي يندبه لهم .
على العموم بعد مقتل الشيخ حسن و رستم الجميع فكر بانه الفتنه و الاختلافات انتهت حتى بعد سنين ، علي سلطان من قوم الرئيس اللي كان مقيم في قرية صروباش قايل حق عبدالغني ( غريس في نخلهم ) انه محتاج تفك و ابغيك تدور حقي .
بعد كم يوم عبدالغني يسير حق علي سلطان و يقوله انه الحاج يوسف مهمدي راجع من البحرين و يايب معه كم نوع من الاتفاقه (بندقيات ) و ما نعرف انت اي نوع تبغي لذالك ابغيك اتي بيتنا و انا بيب لك الاقفاقه من بيت الحاج يوسف و انت شوف اللي تيوزها ( اللي تعجبك ) اخذها .
علي سلطان غافل من انه عبدالغني يبغي يخون فيه و انه جاسوس الشيخ ، ركب احمارته و راح الدشتيه و من دخل بيت عبدالغني اكثر من 10 اشخاص زرقوا (طلقوا النار ) عليه من الدهريز ( الحجرة الاماميه للباب في القديم يسمونها دهريز ) و جتلوه ( قتلوه ) .
اللي ابغي اقولكم من القصه انه الانقامات كانت مستمره حتى لم يبقي ولا واحد من عائلة الرئيس في الدشتيه .
22- اجلعة (قلعة ) الدشتيه تابعه حق امنو؟
* اجلعة القديمه تابعه للشيخ مذكور الاول و كان يعيش في كلات الحمراء و هالاجلعه و ايضاً عنده اجلعة في القابنديه و بعده ابنه الشيح حسن ايضاً سكن فيها .
ولاكن اجلعة الجديده تابعه للشيخ مذكور الثاني .
23- عن ايام الشيوخ اكيد الكلام وايد ولاكن انا ماعرف شو اسألج . شو رايج انتي بروحج تخبرينا عن اللي تذكرينه؟
* الشيخ مذكور الاول كان غير زوجته الاصليه و ام اعياله اللي كانت متواجده في القلعه على اخر عمره تزوج بنت من الاتراك (تركيه) و ايضاً اخذ كم فارس شجاع من اهلها و خلاهم من ضمن جنوده .
يوم اللي قبضوا على الشيخ في كلات الحمراء و قبل نقله الى شيراز ودع عائلته و مرافقينه في القلعه و ثم طلب من مأمورين الدوله حتى يسمحون له لتوديع زوجته الثانيه (التركيه) .
على العموم الشيخ مذكور امجتف ( مكتوف الايادي ) كان يمشي جدا و ما يقارب 200 شخص من مرافقينه و مأمورين الدوله و الناس خلفه يمشون في سكيك الدشتيه متجهين نحو بيت زوجته لتوديعها .
و عقب شهور اعدموه في شيراز .
يوم اللي تم نقل الشيخ مذكور الى شيراز عبدالرحمن خاكي اللي كان بصفة باكارفي قرية الدشتيه راح الاجلعه و ترس اربع ابيابه (علبه ) من الصكوك اللي الشيخ روحه صانعنهم و حطه فوق الجمل و وداهم بيته حتى يحتفظ فيهم لين يرجع الشيخ مذكور .
25- عن سالفة مساعدة ابو الشيخ جباره حق عدد من سكان الدشتيه اللي مركبهم كان خراب اذكر سولفتي حقي من قبل ، ياليت تخبريني عنها مره ثانيه !
* هيه ، في يوم من الايام عدد من سكان الدشتيه فوق مركبهم الشراعي كان ناويين يروحون عابادان ولاكن قريب احد قرى منطقة كنقون لنجتهم اختربت و راحوا الى الساحل و ما كان عندهم شي ياكلونه لذالك " الملا حرم " (زوجها ) قال انه انا بكتب قصيده في وصف احد شيوح القريه و ابغيكم توصلونها له .
المهم الملا حرم يلس تحت شجرة الروله وحيداً و كتب قصيده جميله في وصف شيخ تلك القريه و ثم ندب ( طرش ) عبدالرحمن ابراهيم و شخص اخر مع القصيده الى القريه ( اعتقد قرية عيننات ) . و عبدالرحمن ابراهيم وصل القصيده الى الشيخ و شرح قصتهم . الشيخ استانس كثير بقرائت القصيده و بعدها شل 13 تومان مع قلتتين تمر و عطاهم .
الملا حرم كان يسولف لي و يقول بأنه بعد ساعات شفت شخصين مع زبيلين كبار( سله من خوص النخل ) فوق راسهم يايين صوبي و من الفرحه يركضون .
25 - شو كان احساسج اول ما شفتي الرادو ( الراديو ) ؟
* تقريباً قبل 50 سنه " الملا حرم " كان راجع من البحرين و قال بانه في البحرين طالعه حديده و تتحجا ( تتكلم ) ، انا ما صدقت حتى في يوم من الايام عند ما ولدي فاروق كان عمره تقريباً سنه رحت مع الملا حرم الى قرية الاهشوم و في اليل باتينا ( بقينا ) بيت واحد من الربع . و يوم الملا حرم رجع من صلاة النوم ، قالي اذا تبغين تشوفين ذيج الحديده اللي تتكلم تعالي معي .
انا شليت فاروق و الملا حرم مسك يد بنتنا فطوم و رحنا حتى وصلنا الى بيت كان فوق الينز (فوق البيت) ناس وايدين و كان ايي صوت ، الملا حرم قالي هذا صوت الحديده اللي خبرتج عنه و اذكر وقفنا في السكه اكثر من ساعه و نسمع الصوت و كنا مستغربين و فوق الينز ( فوق سقف البيت ) كانوا اكثر من 15 شخص و يسمعون الرادو .
26 - زين شو ذكرياتج من مشاهدة اول سياره ؟
* انا شايفه السياره قبل الرادو ، يعني قبل 74 سنه عند ما كنت في العاشره من عمري اذكر الشيخ سيف اللي كان يسكن في قلعة الدشتيه كان عنده سياره جيب خضره و دوم كانت واقفه تحت اشجره جدام القلعه . انا و باقي البنات كنا نروح و من بعيد نطالع السياره و كنا ننتظر حتى نشوف كيف تشتغل و يوم تتحرك كنا نركض خلف السياره و فرحانيين و كنا نستانس يوم نشوفها تمشي .
27- زين شو تذكرين من مشاهدة اول طائره؟
* الصراحه انا ماذكر شي ولاكن امي كانت تسولف و تقول انه اول ما تزوجت الناس سامعين صوت غريب من السماء و الناس من خوف انه غضب من رب العالمين الكل يشرد و يدخل البيت و يقفل على نفسه و يوم الصوت خلص الناس طلعوا برع و الكل يتسائل عن مصدر الصوت و الكل يقول شي و اكثرهم كانوا يعتقدون بأنه عضب من رب العالمين ولاكن بعد فتره الناي قاموا يقولون انه الصوت كان صوت ( بالول ) اللي كان سامعين اشياء عنه . بالول اسم الهليكبتر قديماً و الناس اللي كان اييون من الخارج يسولفون حقنا . اعتقد اسم بالول مأخوذه من اسم بالون .
28 - مشكوره ام فاروق على اللقاء الشيق ولاكن كآخر سؤال نحب نعرف شو هي امنياتج ؟
* شو اقولك !؟ في هالدنيا ما بقالي شي حلو حتى اتمناه . ولاكن اطلب الجنه من الله في ذيج الدنيا . فاروق و فطوم راحوا ، ساره راحت دبي و ابتعدت عني ، و في الغربه زوجها و ابو اعيالها اتوفى ، آمنه بعد الله ما رزقها باعيال و من اعيالي بس بنتي حفصه موجوده عندي في القريه و الحمد لله راضيه يوم اشوفها مستانسه