احمد رمضان العامري في ضيافة خاصة
في هالحلقة من برنامج (( رجال من القرن الماضي )) حلينا ضيفاً على الشاعر احمد رمضان محمد العامري من قرية الاكابر (العجابر) في الساحل الشرقي .
المقدمه :
قبل شهرين كتبت ليست من اسماء شواب المنطقه حتى اقوم بزيارتهم بشكل مجدول لللقاء وتوثيق كلامهم ، و اسم احمد رمضان كان من ضمن هالاسماء لذالك يوم الاحد (10/1/2010) الساعه 2:15 ظهراً مع احد اصدقائي تحركت نحو قرية العجابر و هناك بعد زيارة الربع و الاصدقاء تحركنا بشكل جماعي (8 اشخاص ) الى بيت احمد رمضان اللى كان غربي القرية ، وصلنا الى بيت قديمي و باب خشبي كبير و على طول فتحنا الباب و دخلنا لانه يعيش لوحده ، فتحنا الباب و دخلنا ، كأنه داخلين قرن 19 ، جميع ملامح البيت و كل شي فيه يذكرك في متحف اثري قديم .
المهم دخلنا في احد الغرف و شاهدنا شائب في تسعينات من عمره طايح على الافراش و جنبه قطوتين قاعدات ، سلمنا عليه و الشباب عرفوا نفسهم و سألهم عن اهلهم و قال اتفضلوا ايلسوا .
على اي حال قعدنا و بعد سوالف عاديه بدينا معه اللقاء :
( اليكم اللقاء ، و طبعاً مكتوبه بنفس اللهجه حرفياً )
1- بو رمضان ممكن تعرفنا عليك ؟
* احمد رمضان محمد ، انا متولد في تمبو ، انا و اخواني محمد و عبدالله و مايد متولدين في تمبو ، انا ليي (عندي) 107 سنوات بعد ممكن اكثر
2- شو اصلك يا بو رمضان؟
* ابوي بدوي ، نحن بدو . عبود حسينو و عبود سلطان و محمد على بعد بدو الله يرحمهم ، اقوى ما في القبائل نحن و البوسنيد ، هذيل اللي حطوا عبيد ، و البجايه (الباقين) ما عندهم عبيد .
3- اخوانك وينهم الحين؟
كلهم ماتوا ، اخوي مايد اجتلوه (قتلوه) في دلما ، اكثر من عشرين نفر متعاونين عليه و تامين يضربونه ، "علي خلف" كان يقول انه عشرين نفر تعاونوا عليه يالله يالله يابو راسه ( لين قدرو عليه ) لانه وايد قوي . يقول جتفوه دياته ( كتفوا ايدينه ) و حفرو له حفره عند الفرضه و دفنوه و هو حي .
4- شو من القبائل انته؟
* نحن من العوامر ، اذكر مره وحده انا و احمدو كنا امرضه و راقدين في اسبيتار ( المستشفى) في الدوحه و الكرفايه اللي حوالينا كانت خاليه (فاضيه) و جابوا واحد حطوه عليها ، واحد حمر و خشمه طويل و تم يومين او ثلاثه لين استوا اشوه ( تحسنت حالته الصحيّه) و عقب قعد و قام يغني ، و انا فزيت ( قاميت) و سرت قعدت عنده ، قلت له : انت بدوي؟ قال هيه نعم ... قلت شو من القبائل انته؟ قالي انا مري ... قالي انت شو ؟ قلت انا عامري .
اشوف من قلت انا عامري واحد اللي ما كنا محطينه في بالنا ( مب منتبهبن له) فز (قام) من ذاك الصوب و جاء و شبك على ( حظني) ، شبك على و قام يحببني ( حظني و قام يبوسني) ، سويت حقه مكان و قعد في بردي ( قعد جنبي ) و طلعنا سيرة الاهل و الاجدود ، عقب عن يقول انت ولد عمي ، و رفج على ارقبته انه اذا اتي الامارات بذبح قعود جدامك كرامتاً لك . قلت له ولد عمي ما بقدر ايي لو الدختر(الدكتر) يرخصني .
عقب هو ترخص و انا و احمد ودعناه السلامه و سار ، و هذيك شوفتي منه ( ما شفته من بعد ) .
من زمان اكتب له اخطوط (رسائل ) بس محد يرد على الجواب .
7- تتواصل مع اعيال عمك ؟
* كل واحد اندب عنده خط يرقد عليه ( المقصود ما يرد له الجواب) ، و ما يحسبونا عندهم شي .
بعد سكوت طويل قام يشل هالابيات :
بتعت اليوم و السيلي و حن حنين اللذي ،،، كأني قعوداً شارب السيلي
من يوم جاءت مليحوا و بردت حيلي ،،، انا حبيت نفت البرد واويلي
برد اللي طال من الرأس الى ليلي ،،،
( قام يكح و ما كمل القصيده و بعد الكحه بداء بهالابيات :)
في غبة الهند ساقتنا منايانا ،،،انكسر دستورنا و اشراعنا يانا ،،،
لو مانه محمد و رب العرش نجانا ،،، كان غدينا دم اللي حبينا ،،،
شبه موج البحر يشبه محمل وصايانا ،،، و احباب قلبي و ربي التعب يانا .
5- سولف حقنا عن ايام قبل ! عن ايام الغوص !
* آآآآآآه ، سار الغوص و سار ايامه ، انا جم ( كم ) سنه راكب الغوص ، اول سنه ما سرت ركبت الاطواشه ويا اعيال الملا ، البوقلمان يسمونهم .
اول سنه ركبت الاطواشه و ثاني سنه ركبت في الوكره و ثالث سنه ركبت في الدوحه و رابع سنه ركبت لمدت اربع سنوات ويا ولد احمد عبدالله النعيمي ، هذي ثمان سنين و اربع اسنين ويا الكراني هذي 12 سنه . وووووو سنه ويا بوخلف سيد احمد ، بوم عنده و سنه وحده ركبت ويا احمد بن اسنيد( ممكن ازنيد لانه ما كان واضح صوته ) هذا ممكن اكثر من 15 سنه انا داش ( داخل ) الغوص .
الغوص طرب ، لين يت الصبح ( الصباح) كما مدّو المحار في الجالبوت في المحمل و قعدو له و قاموا يفلقونه ( يفتحونه) و يطلعون اقماش ، اقماااااش يطلعون . و لين افلقوا (فتحوا ) نص المحار كما ردو كوّدوه ( جمعوا على بعض) على الفنّه و اصتفوا ( وقفوا طابور) اللي ما عندهم مهره ( مهره = شغل) و قاموا يفلقون لين يخلصونه وقت الظهر. و الغاصه اتغوص ، كل قحبه في قحبتها . و كل عشر تبعات ناس اتحوّل ( تنزل) ، كل عشر تبعات ناس تركب و ناس اتحوّل . و لين ييت المغرب كما انجبوا هالعيش المحمر و السمج المشوي و كما حطوا عليه ( قاموا ياكلونه) .
6- زين شو صار فيكم ايام القحط؟
* وايدن ماتوا من الجوع ، كلهم يغربون يبغون يسيرون عابادان ( صوب احواز) و كل واحد حط راسه رقد و بعد ما قام .
في واحد ياي من قطر و يينزل في شيووه (احد قرى بر فارس) و من شيووه يقبض الدرب و يتم ايي صوب الفوارس و الظهر يتم يتغدى عند محمد الله يرحمه و عقب ما يتغدى ياء (جاء) عندنا الزريبه ( المزرعه ) ، في زريبة " ام الفحل " و تم عندنا لين قريب الأمسيان (المساء) و سارت شيخوه (شيخه) و يابت عيش و طبخته و اتعشى عندنا و عقب طلع يبغي يسير تمبو خل يرقد في المسيد ، و ما يمدي يوصل تمبو و يرقد فوق الدرب ، و اتيله ( جاءت له) قرزه و تقطعه ، برتخته (قطعته) .
وش كثر ناس ماتت من القحط من الجوع ، الحمد لله نحنا لهالقدر ما استكلفنا ، لانه نحنا مجابلين البحر و السمج ، سمج و سواد ، نطبخ جدر سواد و سمج و ناكل .
الحمد لله الحين الخير وايد ، الخير كثير . لاول اللي عنده سحت تمره كان شيخ ، شيخ .
عاد نحن نبدل السمج ويا تمره و دبرنا حالنا الحمد لله .
7- بو رمضان لحقت على كشف الحجاب؟
* هيه هذا خو امسات ، هالطاغوت هذا رضا شاه سوا كشف الحجاب
8- ليش سوا هالشي ؟ ليش سوا هالشغله هذي؟
* يقص سراويل الحريم من الركبه و يخلي ركبتهن طالعه ، و يقص شعر راس الحريم ، و يسوي لهن تواليت ، الله يلعنه ، هالجلب هذا .
9- و الناس شو سووا؟
* شو يقدرون يسوون؟ ..... انا هذا صقيري (صقر ) و غانم الله لا حلهم ان شاءالله ، توي ياي من قطر و اوزار على راسي يديد ، يودوني ( مسكوني ) و شرخو (قطعوا) اوزاري كله ، ما يخلون حد يحط شي على راسه ، كلهم اصاليع
10- اي صقيري؟ منو هذا صقيري؟
* هذا " صقر سعودو " و غانم اخو برهو (ابراهيم) علي غانم شققوا اوزاري و طاحوا .
11- ليش؟
* ماعرف ، هذيل اوادم سرسريه ( مشاغبين ، متمردين) و يدخلون روحهم في كل شي .
( ايضاً بعد سكوت طويل قال : )
في هذي الابلاد جان (كان) حد مر علي غيركم انتوا ! بل بل بل
و عقب قال هالابيات باحساس غريب و دمعه تلمع على خده :
جالس ورا حوشكم و نتنظر بليا غدا ،،، قلوبكم قست و ما بقى فيها ندى ،،، اريد اوصالكم و لا اريد منك غدا .
سكت و ثم بداء بهالابيات :
الهم و الغم مقسى ضميري و الحشا نازلي ،،، انت الابليحيد و انا لهالنبي نازلي
اذ كان يا زين انت عالي و انا نازلي ،،، بمر اليله كف الدنانير يرفع نازلي
بو رمضان كان يعاني من بلعومه و ما يقدر يتكلم وايد لذالك بعد كل كم كلمه يسكت و بعد السكوت قال :
محروس بالله يا ظبي الحشا متعدي ،، لابس ادويحه و ثم شيلة هندي ،، ظباَ تاريخه في ثوب اجدامه ،، خوفي عليه من حزام نابندي ،،، نابند فيها ترتع الغزلاني ،، انا ما شوفها في نقوة البلداني ،،، مر الاخصيب و يسحب اليالي
ايضا بعد سكوت بداء بهالابيات :
سلطان يالس و اليهودي عنده ،، قوم اليهودي اتهاوشوا ملاهم ،، قولوا لهم لا يغسلون ادواهم ،،، انا قتلت ايام طالع كدّه ،،، كدّه الحلو تفاحتاً رويانه ،،، و غصن موزاَ من ورا بستانه ،،،
بعد ما شفت بهالابيات يسرد احداث و مناطق سالته عن نابند ( منطقه في فارس) لانه ذكرها بقصيدته .
شو سالفة غزلان نابند ؟
* ابتسم شوي و عقب قال : نابند ترتع فيها الغزلاني ،،، انا ما شوفها في نقوة البلداني .
عزلان نابند معروفه ، وايد يمحدونها
( و هنا اذن العصر و بما انه بو رمضان مريض و ما نبغي نثقل عليه ، قطعنا اللقاء و بعد توديعه واعدناه بزياره اخرى ...)
