سياحة بحرية (جزيرة دلما )

[عبير دبي]

بسم الله الرحمن الرحيم



السلام عليكم ورحمة الله وبركاته



ياهلا وغلا ومرحب بالجميع ...



أشحالكم شخباركم أن شاء الله بخير ...



الدنيا حر ونار وشمس والناس شردت من الحر لتركيا ولا تايلند ولا سوريا وغيرها من البلدان ...



عاد أحنا ماهجينه قعدنا في البلاد وين بنشرد من الحر هو ورانا ورانا الله يجيرنا أن شاء الله من حر الأخرة ....



قلنا مافي سفر عيل خل نفتر في البلاد والحمد لله الأمارات فيها أماكن وايده يقدر الواحد يقضي أجازته ..



عاد قبل أسبوع أتفقت وي أختي العضوة الظبيانية أن نطلع وي بعض عاد قلنا يالله ندور النا جزيرة فقررنا لجزيرة دلما ..



أنا والعضوة الظبيانية وبنتها والعيال والوالده وبنت خالتي وبنتها .. قلنا يكفي ثلاث أيام ...



بدت رحلتنا يوم الخميس طبعا النوخذة أم يوسف عبير بعد ماصلينه الفجر طلعنا وطلعت الفجر تعجبني لأي مكان ...



وكانت أول مكان نستريح فيها أستراحة واحة أدنوك بالطريج شرينه ريقوق الفطور الصبح ودلة الجاي معاي وعصاير



والاتصال بيني وبين بنت النوخذة طول وقت الطريج ...













وبعدين كملنا السير والكل مستانس ومرينه على مناطق منها طريف رويس قرين العيش بدع زايد وغيرها

من المناطق بس



ماندخلهم قلنا أن شاء الله ونحن رادين بندخلهم .. لحد ماوصلنا جبل الظنة ومعدية دلما مكان مرسى

العبارات والمراكب



الحين حاطين عبارتين بصراحة شي شي ماتحس عمرك بسفينه ..



وحدة الغربية ووحدة يميلة عاد ركبنا يميلة وصعدت سيارتي خذيناها معاي للجزيرة ...



الواحد يحس عمرة في مطعم راقي ولا بأستراحة مكان حلو فيها مطعم كفتيريا مصلى تلفزونات عزكم الله حمامات ..



















هذا مكان للصلاة ..















هذي العبارة مثل باص تسير لجزيرة صير بني ياس وأن شاء الله لو الله عطانه عمر بنسير صير بني ياس







طلعنا الساعة عشر الصبح من جبل الظنة ..











طبعا قاعدين سوالف وشرب وأكل والكامرة في يدنا أنا والظبيانيه ونصور المكان والأجواء ,,



بعدين طلعنا وركبا فوق السطح ههههههههه فوق العبارة فيها يلسة في الشتا الجو عجيب بس الصيف حر موت

















تكملة الموضوع لا تستعيلون وتردون يا أعضاء صبرووووووووووو

[عبير دبي]

وصلنا جزيرة دلما بالسلامة










عندنا أهل بجزيرة دلما وكانوا بالاستقبال

سرنا البيت وقعدنا وريحنا وتغدينا لحد العصر والعصر طلعنا نتحوط في الجزيرة

فيها ماشاء الله بيوت شعبيه وهي بيوت حكومية مركز شرطة أتصالات مدارس كل شي متوفر الهم من المرافق العامة

هذي البيوت ..




هذا بيت ولد خالتي ساكن بجزيرة دلما والبيت مقابل البحر على طول نطلع من البيت للبحر وطبعا مايفوتنا شي نسير

نتسبح سواء الصبح ولا

العصر ولا بالليل








ماشاء الله تبارك الرحمن مساجد فيها وايد وتصاميم حلوة ..




هذا مركز تسوق مول بس يقولون مثل جمعيه مادخلته كلهم دخلوه بس أنا ماسرت اله




فيه متحف صغير في الجزيرة كان مسكر






نادي سيدات جزيرة دلما ..







طبعا الجزيرة فيها مزارع للنخيل والخضروات وفيها بوش مواشي











بعد لا تستعيلون وتردون فيه تكملة للموضوع

[عبير دبي]

عاد بدت الشمس تغيب وبدا الظلام










بالليل بعد العشا سرنا نمشي المنطقة مشي وبعد مارجعنا دخلنا البحر نتسبح بالليل ...

والصبح قمنا وتريقنا وشليت السيارة وسرنا نتحوط بعد في دلما والكامرة معانا












هذا صقر بحري هههههههه أول مرة أشوف صقر بالبحر ..

الصقر قريب القصر صورته ..







صاحب هذا البيت شكله يحب البحر والتراث حاط محمل على البيت




القطوة تسلم عليكم تقول أنا من سكان هاي الجزيرة هههههههه




هم لا تستعجلون وتردون فيه تكمله للموضوع ههههههه

[عبير دبي]

عاد رجعنا وريحنا الظهر وتغدينه والعصر يالله بعد طلعنا كلش ماقعدنا بالبيت

سرنا صوب الجبال الجبال والبحر قريبين من بعض

هذا الجبل يسمونه جبل منوخ












طبعا عندي صور وايد بس ما أقدر كلهم أنزلهم




وظلمت الدينا علينا ونحن نفتر بالجزيرة




كان قبل كم يوم متفقين البنات وي ولد ولد خالتي يسون حفلة لبنت ولد خالتي خريجة

ثانويه وهم مفاجأ الها ماكانت تعرف

ومرتبين كل شي ..

ماشاء الله عليهم مالين الميلس كله بلونات شي حلوووناسة





بعد ما أحتفلنا وقطعت الكيكة العيال قعدو يلعبون بالبلونات الي يبط أكثر بلونات وضحك وصريخ كلنا هههههههه







بعد الحفله كانوا طالبين عشا مشاوي وفطاير وأخذنا العشا بالليل وسرنا على البحر

نتعشا والجو حلو وهوا مب حر

رجعنا البيت واليوم الثاني قمنا وجهزنا نفسنا للسفر والرجعة وماكانوا ودهم يردون وعجبتهم الرحلة بس شو بنسوي مافي وقت ..

عاد رجعنا في الغربية وللأسف كامرتي ماعرف شو بلاها ماتشتغل




وبعد ماوصلنا جبل الظنه قلت خل أفتر فيهم المناطق الغربية التابعة لبوظبي

مرينه على الرويس وبعد الرويس بدع زايد وتغدينه في بدع زايد وكملنا رحلتنا ودخلنا منطقة المرفأ

لفينه فيها وفيها كورنيش وحديقة والعيال لعبوا بالحديقة ..

ورجعنا وبنت النوخذة سارو بيتهم ونحن كملنا الطريج لدبي لان الظبيانيه من بوظبي

وصلنا البيت على الساعة 11 بالليل وهاي كانت رحلتنا

الحين يالله عليكم بالرد وأنتهت الرحلة

وأن شاء الله مع رحلات ثانية ..





الحين خلصت يالله خل أشوف رايكم وردكم

ونلتقي على خير أن شاء الله ..

[الظبيانية]

ههههههههههه


مشالله عليج ياعبير لا يحسدونا الشباب بيفولون عيائز و هذا كل يطلع منهن هههههه

اختي الغاليه و رفيق الرحله كفيتي و فيتي

[كحيلآن الحمادي]

ياالله عبير بسرعه ...
ناطر ماني رااد خخخخخخخ

ما شاء الله عليكم اختي عبير
تقرير مفصل .. وتوظيح كأنا الواااحد معاكم
عساكم دوم فرحه وسعاده
وننتظر رحله جديده << طمع الاخ ههههه
يحفظج ربي ..

[بوفهد]

ماشاءالله دلما حلوه و تقريرج زادها حلاه و الصراحه شوقتينا نزورها

رحله جميله و تقرير رائع من جزيرة دلما تحياتي لج و للاخت الظبيانيه

[الصقر]

ما شاء الله عليكم تقدييم ولا اروع

احلى صوره عجبتني




...........


شكرا لـ عبير و شكرا لـ الظبيانيه على التقديم الجميل من جزيرة دلما الجميله

[عبير دبي]

هلا وغلا ومرحبا فيكم نورتوا المكان بردودكم

أتمنى لو شباب عرب الساحل يسون قروب ويطلعون رحلة ونشوف تقريركم

أن شاء الله بتشوفون تقارير يايه بأذن الله تعالى

نورتوا الموضوع بردودكم وبارك الله فيكم

[الظبيانية]

ما شاء الله عليكم تقدييم ولا اروع

احلى صوره عجبتني




...........


شكرا لـ عبير و شكرا لـ الظبيانيه على التقديم الجميل من جزيرة دلما الجميله

اخوي هذا النج لو قصه عشان جي صاحبها حطها علي سطح بيت حتي ماينسها