رحلة الوادي ( عين خت )

[عبير دبي]

بسم الله الرحمن الرحيم

السلام عليكم ورحمة الله وبركاته

صبحكم مساكم الله بالخير جميعا ..

يا الشتا وأعتدل الجو وبدت الرحلات وطلعات البر ..

والطلعات تغير نفسية الواحد وبالذات الطلعات في الطبيعة الواحد يحس براحة ..

عبير أهي النوخذة والربان والمرشد والمخطط للرحلة ..

بدت رحلتنا يوم الخميس على الساعة 10 الصبح سرنا أمارة رأس الخيمة طبعا كان المخطط نسكن في

فندق عين خت الحريم الكبار قالوا شو بتعلقونه فوق .. فوق الجبل نحن مانبي فوق أهم شي راحة الكبار

بالسن .. نزلنا فيه أستراحات بالعين سرنا الها ونرضي أمهاتنا ...

صح المكان مب مثل الفندق راقي وحلو وجديد زين ..

هذا الفندق فوق عين خت عند القلعة ..




هذا المكان الي سكنا فية ...





هم فيه قسم للشباب مبنى دورين ..

بعد ماحطينة أغراضنا بالسكن قالوا بتغدا تحت العريش المقابل السكن قلنا أوكى والجو حلو تغدينا وبعد

ماتغدينا بدا الجو يغيم وتنفنف مطر يعني شوي ..

العصر قالوا يالله بنطلع قلت الهم يانا على موبايل أخبار برق الأمارات أمطار غزيرة في وادي كوب ووادي

السدرة خل نسير ونشوف وقريب من عين خت ... سرنا دخلنا المنطقة ودخلنا الوادي مافيه شي ناشف

وأنا أمشي بالسيارة يت سيارة صوبي قالت الي حاسبي وأرجعي الوادي ياي بالطريج قلت حياه

لازم أشوف الوادي وأمي تصرخ يالله ردي الوادي بيشيلني وولد خالتي يقول بنرجع قلت ماشي خل نسير

ونكمل ونشوف الوادي ,,, بدايت وصول الوادي واليهال مستانسين ويتبعونه في المشي ..







والناس مستانسين والسيارات بالوادي وانا واقفة واصور ولا هامني الماي ..









بعدين قعدنا على طرف الوادي وسوينا جاي وقهوة وشربنا لحد المغرب وبعدين طلعنا وسرنا لمسجد في

المنطقة وصلينا المغرب ..





طلعنا من المنطقة ورجعنا لراس الخيمة قالوا مابنرجع السكن بعده وقت توه المغرب قلت يالله بنوديكم

حديقة صقر وودينهم وتعشينه والعيال لعبوا لحد الساعة 11 بالليل ورجعنا السكن ونمنا وقمنا الصبح وتريقنا

قالوا يالله بنسير نتسبح عين خت عين مياة كبريتية حارة طبيعية ..









هذا الدرج ينزل من الفندق إلى عين خت الي ساكنين العين ..




هذا البيت قريب من عين خت تصميمة حلو وقديم تراثي ..





بعد ماخلصنا وتسبحنا قالوا ها الينوخذة وين وجهتنا قلنا أن شاء الله بنسير وادي البيح برأس الخيمة ..

شرينا غدا وسرنا وادي البيح وقعدنا في الوادي وقريب من برادات ماي بارد ..







هذا جدر العصيدة نسخنة مسوينه ويايبين ويانة ..



غدانا الله يسلمكم برياني لحم وبرياني دجاج ..



هذا استاند الكاميرة ..



الي مالة أول مالة تالي ..



هاي تبي تعطي راعي ماي السبيل اجر تشرب منه ..




هذا سيد ملان دايما ولدي يوسف يقولي أمي ملان لو أحنا بالطلعة فمسمتنه سيد ملان ..



هاي لقطات من الطبيعة ..





طبعا عندي صور وايدة بس السموحة منكم تعب التعديل والتنزيل ..

بعد الغدا قلنا بنطلع ونكمل المسير وبنتبع الشارع لحد وين بيوصلنا ومشينه تقريبا نص ساعة دخلنا بين

جبال عالية وسبحان الله في تكويناتها .. بس للاسف الكاميرة فضت البطارية عندي ..

وشفنا أجانب ماشاء الله عليهم يتسلقون الجبال بالحبال ووقفنا نشوفهم ونتفرج عليهم ..

مثل العناكيب يتسلقون ..مب أحنا شوي صعدنا نخاف نطيح بس عبير ماتخاف تصعد ...

وأنتهت رحلتنا وجولتنا ومشينه الي وياي ساروا أمارة أم القيوين وأنا الشارجة بيت أمي وبالليل رجعت

البيت .. كانت رحلة ممتعة وسعيدة والحمدلله الكل أستانس منها ..

هذي كانت جولتي ورحلتي ..

وأن شاء الله تستمتعون معنا بالرحلة ونشوفكم على خير أن شاء الله ..

[وليد جابر آل بوخلف]

ماشاءاللة كشتة جميلة و من الصور باين روعة المكان و الاجواء ...

ان شاءالله دوم مستانسين و يا محلا اكلة البر و جنبك وادي يمشي و طبعا مع الاهل...

ربي يعطيج العافيه و تقبلي تحياتي

[الظبيانية]

مشالله الله يحفظج اختي عبير مره ثاني حسبي تراء الوادي ماله امان


يعطيج العافيه صور جميل و ممتازه

[كحيلآن الحمادي]

ما شاء الله عليج اختي عبير .. مغامره
باين الرحله جميله وممتعه ..
يحفظج ربي*

[بوصقر]

الحمدلله على السلامه

الله يحفظكم جميعا من كل مكروه حاسبي على عمرج و على عيالج


صراحه رحله ممتعه و جميله و تصوريج الاحلى


يبالنه نظهر كشته و نخبركم بس كشتتنه كشتة شواب ما بتعيبكم ههههههههههه لا ان شاء الله بتعيبكم

[أم يوسف]

رؤؤؤؤؤؤؤؤؤؤؤؤؤؤؤؤؤؤعهـ الصور تجنن

آالمكآآآآآآآآآآآآآآآن يجنن

منو قدج واللهـ

ياربي دوم مستانسن..~

[أحمد الحوسني]

يعطيك الف عافية اختي عبير

رحلة موفقة ومرة ثانية خذي بطارية احتياط

[عبير دبي]

الحمدلله على السلامه

الله يحفظكم جميعا من كل مكروه حاسبي على عمرج و على عيالج


صراحه رحله ممتعه و جميله و تصوريج الاحلى


يبالنه نظهر كشته و نخبركم بس كشتتنه كشتة شواب ما بتعيبكم ههههههههههه لا ان شاء الله بتعيبكم

بالعكس رحلة لشواب حلوووووه وماتتفوت

تسلم يمناك ياخوي منور الموضوع

[عبير دبي]

الله يعافيكم ويبارك فيكم

مشكورين ماقصرتوا على التواجد